عفيف دياب ||
بين 2021 و 2022 زرعنا مع الرفيق الفلاح نصرالله بتلال #كفرشوبا شوية كرز وتفاح وكستنا. كانت الفكرة انو لازم نزرع هالارض وما تبقى بور وإن كان في فوقك مباشرة كم موقع عزرائيلي. قال نصرالله مش غلط نزرع وبتعمل بستان كرز مع مصطبة تحت شجرة البطم بتكون خرج قعدات مشاوي ومازتها من مأكل ومشرب. كنا عارفين انو ممكن المشروع يتعرض لشي عزرائيلي، بس نصرالله قال و”إن يكن” هيك لفظها بكل ثقة.
زرعنا وسيجنا الكرم الجديد وزبطنا المصطبة. نجح الزرع وبلش يتناغم مع الأرض وترابها، وبلش ياخذ الكرز طريقو صوب السماء. شجيرات بريئة خاف منها العزرائيلي..تركها لحزيران 2024 وقرر يحرقها مع بساتين تانية لاهل كفرشوبا. تلال هالضيعة اقوى من الحرق والجرف والقلع هيك علمونا جدودنا واهلنا. زيتوننا المعمر اللي سرقوا الاحتلال من سهل الضيعة الجنوبي ما راح يتهنا فيه هيك بيأكد اهلنا بكفرشوبا. وحرق بساتين الكرز ما راح يحبطنا كمان هيك بيقولوا بكفرشوبا. هني وتحت القصف بسنة 2024 نزلوا على سهل الضيعة بحلتا وزرعوا زيتون وتين وعنب وليمون وافوكادو ..ما قدر العزرائيلي يحبطن. وهني كمان ما راح ينسوا حقن. حقن بارضن وتلالهن ومزارعهم. ولا راح ينسوا حقن من دولة بتتذكرن بس بدها ضريبة او محضر ضبط.
ومن الاخر.. المقاومة مش بس بارودة وصاروخ..هيي كمان شجر وثمر طيب.