عفيف دياب ||
على هامش الذكرى الخامسة لإنفجار مرفأ بيروت
ــــــــــــ
القصة مش بس انفجار مرفأ..هي قصة نظام طائفي متوحش جاب للبلد كل الويلات من يوم ما عرفنا شي اسمو الاستقلال سنة 43.
هيدا نظام جبلنا مصيبة ورا مصيبة..
نظام خلانا نمشي ورا جنازاتنا ونحمل شنط الهجرة والتهجير..
نظام طائفي عمل حرب أهلية مصغرة سنة 58 وتسبب بانهيار مالي كبير سنة 66 والانكى والأكثر خطورة انو تخلى عن الجنوب من سنة 48 وصارت هالمنطقة ميادين حروب وموت وتدمير.. واجتياحات وغزوات إس..رائيلية وصولا للعاصمة #بيروت..
نظام ما خلا جيوش غربية ما بعتت اساطيلها لتقصف هالبلاد الحلوة.
نظام عملنا حرب أهلية سنة 75 وبعدنا عم ندفع فاتورة غبائنا، يسارا ويمينا ووسطا وفوق وتحت..
نظام طائفي قاتل تسبب بغزو جيش حافظ الأسد للبنان وخلاه يركب على ظهرنا شي 30 سنة..
نظام فتح بواب البلد على مد عينك والنظر.. وما بقي مندس شرق اوسطي وافريقي وآسيوي الا ما فات علينا وبل ايدو فينا.
نظام متخلف عمل اتفاق #الطائف وسماه “دستورنا الجديد” ووزع المغانم على ميليشيات صارت هي الدولة و”حاميها حراميها”.
نظام فرض علينا زعامات صارت مومياوات لا بتسمع ولا بتشوف بس بتسرق وبتنهب ونحن مبسوطين على قلبنا متل العسل.
نظام عمل مرة ثانية بتاريخو أكبر انهيار مالي وسرق أموال الناس بلا رفة جفن..
نظام مش بس عمل انفجار مرفأ بيروت بعد اكبر سرقة مالية بالعصر..عمل كتير انفجارات سياسية واجتماعية واقتصادية وبيئية!
نظام شيطاني عمل كل شي فيه موت وقتل ونصب واحتيال وتزوير ..
القصة مش بس انفجار #مرفأ_بيروت..القصة هي انفجار البلد وتحويله بلاد قبائل وطوائف وزعران سارحة والرب راعيها..
نظام خلانا قرطة عالم مقسومين..كل شوي منا عاملين مزرعة وحاطين ثور يرعاهن!
قال مرة #زياد_الرحباني: يا ثورة يا موت.. عذراً زياد عملنا بس موت