الجحش قال للحمار

أحمد فؤاد نجم ||

يابا اديني الحنطور

يابا إنت سنّك كبرو

أحمد فؤاد نجم

وَجَب عليّا الدور
كَـحّ الحمار كَـحة
فزعِت لها الركاب
مش يابني بالصحة
ده كل شئ بحساب
وسواقة الحنطور
محتاجة حدّ حكيم
وإنت عينيك فارغة
همّك على البرسيم
قوللي تسوق إزاي
والتبن مالي عينيك
ده حتى حبل اللجام
واسع يا إبني عليك
إعقل و بطّل طمع
لا تسخّن الركاب
ماتجيش يا واد جنبهم
لا تبقى ليلة هباب
دول صنف ناس جبّار
قادر مالوهش أمان
يبان عليهم وَهَن
لكنهم فرسان
يابا دا نومهم تِقِل
و بقالُه يابا سنين
كل البشر صحصحوا
ولسه دول نايمين
يا جحش بطّل هبل
وبلاش تعيش مغرور
رُكابنا مش أغبيا
ولا عضمهم مكسور
بُكرة حيصحولك
ويزلزلوا الحنطور
وتلاقي في قفاك
تمانين خازوق محشور